專欄｜德國又小組賽出局？

歐國盃唔夠一個星期開鑼，德國仍然危危乎，我Will仔認為稍有不慎又會小組賽出局，其實對手瑞士、蘇格蘭及匈牙利都係難搞。

先睇黑鷹自身，德國兩場友誼賽分別和咗烏克蘭同絕殺希臘，唔可以話十分有說服力，兩個位置又有發生失誤，門將紐亞對希臘一個遠射甩手，被人補射執雞；對烏克蘭有一球出迎傳失，其實覺得佢一路嘅水準都有下降，近兩個月接二連三都有失誤，仲要係低級犯錯，但正選位一定係佢，一定會令球迷擔心。

另外一個位置就係莊拿芬達，達哥喺利華古遜踢三中堅當然無問題啦！最主要幫兩邊執漏同包位，但係德國?家踢Back 4，每當俾人逼搶嘅時候都會好易甩，其實對希臘失嗰球正正就係佢交咗個「醫院波」出嚟，所以佢畀人感覺都唔係好穩陣。

睇下對手瑞士，絕對係今屆其中一隊黑馬，唔好睇佢用嚟用去都係沙基利，但其實佢哋中場都係幾齊人，格列沙卡同富拿都係一對實而不華嘅中場，不論掃蕩定係做反擊嘅第一點都係咁醒神。匈牙利外圍賽5勝3和未輸過，佢哋穩守突擊係有啲驚喜，而且係最早出大名單嘅球隊，絕對要留意。蘇格蘭好多高空轟炸，絕對有機會恰到德國，隨時趁佢哋瞌眼瞓整咗一粒，然之後擺喺後邊守。

德國呢組望埋去好易出線，但其實都係有啲困難，隨時又有可能小組賽出局。Willhappy

-----

《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ