專欄｜幸福的煩惱？

英格蘭再一次令支持者失望，實在令人心涼，領隊修夫基能夠在選人時，放棄身價近億的基亞利殊，事後接受訪問時，風騷地表示，好高興自己能遇到這種好球員多到唔知點選擇的「幸福的煩惱」，然而這種「幸福的煩惱」，正如男人三妻四妾、左右逢源，不是人人受得起的。

其實俾着任何領隊，「幸福的煩惱」大概只是在傳媒面前的外交托詞，這種人才過盛問題，實際上非常難搞，若果這件事發生在球會還好，領隊起碼有更多時間和機會磨合，成季流流長，可以輪換方式解決部分問題，但發生在短促的國家隊賽事，根本無太多時間和機會容許犯錯。要解決這種情況，領隊沒有膊頭和膽量，就會將幾個球星放上場，由佢地爭做「男一」，情況就如英格蘭現時一樣，仍未內戰完，未定到大佬。

其實同樣情況今季在車路士都有，但普捷天奴可謂一錘定音，抗住壓力，押注在高爾彭馬這名完全沒有證明的年輕人身上，而最終未必是賭對了，但起碼唔會衰得去邊。「幸福的煩惱」對於一些有地位和膽量的領隊仲可以叫好事，調轉講對於正常人絕對只是「煩惱」而已。

當然，其實國家級賽事又唔使用球會級的水平尺去量度，唔少球隊都係得一兩個核心，其他人自然會圍住佢配合，反而效果仲有保證。格魯吉亞得前面兩個打得，簡簡單單，今晚能逼和捷克唔意外。馬高
?