專欄│「德國金童」爭奪戰

講到「德國金童」，大家可能會記得達斯拿，由史浩克04去到禾夫斯堡再到巴黎聖日耳門，但係表現同潛力就唔成正比，可以話轉錯會都係佢最大嘅主因。今時今日嘅新聞，都係圍繞着另一位「德國金童」科利安華迪斯。

暫時有3隊波爭緊佢，皇馬，曼城同埋拜仁，講下呢3隊波嘅處境，皇馬前線人腳爆晒棚，星味都十足，如果要擺多個華迪斯，都唔知擺佢喺邊好，況且皇馬而家同基利安麥巴比都仲未夾得熟，雖然佢哋的確係缺少咗一個人負責派牌，但個位置上似乎唔係咁適合。

曼城其實幾適合佢，一路都搵緊個奇雲迪布尼接班人，似乎佢可以融入呢套體系，亦都係最舒服，可以有一個咁好嘅艾寧夏蘭特同佢做配搭，絕對係夢寐以求嘅組合。不過曼城似乎有啲軍心不穩，究竟嗰百幾條財務違規搞唔搞得掂？再加上今季成績麻麻地，似乎亦降低咗呢個可能性。

小弟覺得最大機會都係拜仁慕尼黑，始終德國班霸，再加上拜仁認定華迪斯係夏天第一個目標，加上適應性，始終穆斯亞拿同甘美治等都係國家隊隊友，即管睇下拜仁嘅出手可唔可以令到利華古遜滿意。

不過轉會窗往往都唔係睇咁少嘢，除咗價錢之外，都要睇球員嘅性格，球會嘅經濟狀況，經理人點樣去Deal都係重要嘅因素，所以都係慢慢剝花生睇好戲。Willhappy