专栏｜欧洲德天下

今年可以话真系德甲年，拜仁、多蒙特晋身欧联4强，利华欧霸4强，3场波都非常之有说服力。

先讲利华古逊，今年保持强势，战术众所皆知，次回合面对韦斯咸有一样嘢真系估唔到，必定系沙比阿朗素够胆30分钟作出换人调动，后防哥苏奴被换走，换入塔苏巴，完全封死左安东尼奥，教练真系居功至伟，同时利华淡定嘅控球，完全唔惊韦斯咸嘅逼抢，不停左转右右转左，尾段凭住谢利美费林邦省中人入波，保持到不败真系好高水平，就算球队踢得差，依然可以凭着整体稳定性过关，展现到点解今年可以喺德甲称王称霸。

欧联方面，多蒙特主场神奇晋级，撕破咗铜墙铁壁嘅马体会，要知道多蒙特喺主场面对呢场波都系有难度，其实整体上多蒙特战术改变唔大，依然都系大开大合，不过好多球员都系超水准发挥，晓姆斯、祖利安白兰特及富克洛个人水准都好高，系今季嘅代表作，马体会其实有反超过，只系多蒙特凭着佢哋主场嘅韧力，加上球员咬紧牙关，可以绝地反胜，上演今年最精彩嘅欧联赛事。

拜仁对住阿仙奴，凭着佢哋嘅底蕴赢波晋级，有好多球员喺今场波可以话系起死回生，甘美治及哥列斯卡踢出近两年表现最精彩嘅赛事，甘美治最主要有个入波，同时佢好多传中波都创造咗好多机会，决定快左，推进速度令到对手好麻烦；哥列斯卡整场扫荡，专心防守，只要落咗指令畀佢，佢就会做得非常之好，两个德国球员真系令我另眼相看。

今年，欧洲真系德甲天下，因为3支球队展现咗唔同嘅角色性格，令到德甲攞到来届欧联第5席。Willhappy

-----

《星岛申诉王》推出全新项目「区区有申诉」，并增设「我要赞佢」栏目，现诚邀市民投稿赞扬身边好人好事，共建更有爱社区。立即「我要赞佢」︰https://bit.ly/3uJ3yyF

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ